De Aare-Mitteldamm
Be Aarau gets es Monumänt:
De Mittuwdamm, wo jede kännt.
Ganz Aarau schwümmt, scho Jahrzähnte lang
Dür de Kanal entlang em Damm.
Bekannt und beliebt isch de Kanal,
För veli Schwümmer di erschti Wahl.
S Wasser isch umsäumt vo Böim,
D Szenerie verfüert zum Tröime.
Am Ufer reiht sech Stamm a Stamm –
Es richtigs «Goldstöck» isch dä Damm!
S Schwümme hie im Kanal
Isch eifach und total genial.
Dr Fuesswäg uf em Damm isch toll,
Spaziergänger si voller Lob!
D Bänkli lade i zum Verwiile,
Kei Stress, kei Grund zum pressiere.
Erholsam, ruig on still, kei Vercheer –
Oh Mönsch, was wosch de no meh?
S chüele Wasser, oftmals Sunne,
Fasch wie im Urwald, was für e Wunne.
Dr Amazonas schiint ned witt,
Vergässe wird Ort und Zyt.
Mit Spass und mängmal öppis Mut
Stürzt jede sech i d Fluet.
Allei, mit Hund, mit Chind und Chägel –
Und das bi jedem Wasserpegel.
Dr Mitteldamm, dä söll jetz wiiche –
Das isch es völlig falsches Zäiche.
Dr Mini-Stromgwinn in Ehre,
Degäge müesse mir üs wehre.
Hie gilt dr Vorrang vo dr Natur,
Zentraler Bstandtäil vo dr Kultur.
Bewahre mir Damm und Kanal –
En Rückbau wär total fatal!
Und o dr Chraftwärchturm als Zaiche
Dörf nie neue Baute wiiche.
Dr Kampf wird sicher sech lohne,
Natur und Umwält spürbar schone.
D'Rettig vom Damm esch wichtig,
D'pro Argument se klar und richtig.
Gross esch aktuell dr Stamm
Vo Fründe um e Mitteldamm.
Dr Dank vo de Bürger, das isch klar,
Wird überduure veli Jahr.
Drum «Rettet de Mitteldamm» –
Jede hilft so guet er cha!